AI-AIS:

AI-AIS, of vuurwater, is 'n warmbron geleë aan die suidelike einde van Namibië se Visrivier Canyon. Dit is ook die hoofkwartier van die park waarin die Canyon geleë is.

Die Canyon is 550 meter diep, en 161 km lank, en geleë in 'n dorre, barre landskap. 'n Roete wat die lengte van die Canyon volg, bied fantastiese uitsigte daarop, soos die meegaande foto illustreer.

Aan die einde van 'n stowwerige roete wat tussen wonderlike rotsformasies loop, bereik 'n mens die oase wat Ai-Ais is. Met sy bron wat water van 60 grade Celsius lewer, 'n reuse buitenshuise swembad, en heerlike binnenshuise spa-baddens, is dit by uitstek 'n plek om as gesin te gaan uitspan.

En as jy régtig aktief wil wees, pak jy die staproete, wat oor 86 km, of 5 dae strek, en by Ai-Ais eindig. Dan sal jy Ai-Ais éérs waardeer!