DIE KANDIDAAT!

No.10(21/8/1998)

"Dis 'n bleddie gemors, sê ek julle!" murmereer vriend Hay. "Selfs Solomon loop hier rond met 'n Cosatu T-shirt!" Dit help nou nie dat Sollie al tot vervelens toe probeer verduidelik het dat hy die T-hemp pasella gekry het, toe hy hom dood onskuldig in 'n Cosatu optog vasgeloop het, toe hy mieliemeel gaan koop het op Phalaborwa nie.

Die manne sit hier langs die hardekoolvuur by die Olifants, en bespreek die moontlikhede vir die opkomende verkiesing. Vriend Hay se probleem is dat die wernemers by sy drankwinkel by 'n vakbond aangesluit het. Laas toe hy in die Paarl gaan wyn koop het, het hy van die uitgediende dopstelsel te hore gekom. Vindingryke man wat hy is, het hy besluit dit is net die manier om sy werkers te paai. Toe dring die shop steward aan op Chivas Regal, en toe vriend Hay weier, word hy by die unie verkla. Toe moet hy die dopstelsel los. Nou is die unie kwaad vir hom, én die werkers is kwaad - vir hom en vir die unie!

"Die eintlike probleem is dat nie een party meer die saak van die Afrikaner stel nie. Hulle baklei net onder mekaar." beleef Jongeling Dunn vir 'n slag 'n helder oomblik.

"Miskien moet ons die ou Sappe weer laat herleef. Dalk is dit ons enigste hoop," laat Ouboet Dunn hoor. Ouboet is ernstig oor politiek en Afrikaner kultuur, maar hy is nie verkramp nie - na die Madelein van Biljon debakel het hy 'n brief aan die ATKV geskryf en aanbeveel dat hulle 'n toekenning aan Loslyf moet maak, vir dié sekstydskrif se bydrae tot Afrikaans!"

Nou is ons almal stomgeslaan. Die Sappe was 'n bietjie voor ons tyd. "Die meeste van hulle wat nog leef, is nou regs van die AWB," verbreek Dok Sarel die stilte, duidelik die enigste onder ons wat daai era meegemaak het.

"Op Vanrhynsdorp het ek eenkeer in 'n verkiesing gestaan," verras Dok ons, maar hy sê nie vir watter party nie. "Een aand hou ons vergadering op Calvinia, en die Partyleier, 'n man van statuur in daai geweste, is daar om ten gunste van my kandidatuur te praat. Ek maak 'n so-so neutrale toesprakie. Toe staan Partyleier op, en praat roerend oor hoe die Party en Suid-Afrika op daardie donker moment in ons geskiedenis die steun van elke kieser nodig het. Die tyd vir verandering is ryp, en Suid-Afrika moet in 'n nuwe rigting gestuur word. 'n Wegblystem is 'n stem vir die vyand. Daar gaan so 'n roering deur die saal, en toe hy klaar gepraat het, toe weet ek ek kan maar pak vir die parlement."

"In vraetyd staan daar 'n kollos van 'n man in die voorste ry op, en hy vra die allerverskriklikste stekelrige vraag oor hoe die Party die 'Kleurling Probleem' gaan oplos. Ek kyk vir Partyleier, en hy kyk vir my. Voor een van ons iets kan sê, spring die Voorsitter ons voor. Hy verklaar bondig, 'Meneer, daar bestaan nie so 'n vraag nie!' Toe verdaag hy die vergadering."

"Ek het dit nie gemaak nie."

Toe weet ons!

[ENGLISH SUMMARY: The discussion around the fire deals with politics, and the perceived problems with the upcoming elections. Doc Sarel surprises them by telling them how he once was a candidate in parliamentary elections. At one meeting, the party leader spoke in favour of his candidature. It went extremely well, and he felt sure that he was bound for parliament. Then someone in the audience asked a very difficult and tricky question. Before either of him or the party leader could respond, the chairman declared that the specific question did not exist, and promptly closed the meeting!]