KWAAI VROUENS!

No.24 (5/2/1999)

"Waar is al die ouens?" wil vriend Hay weet toe hy laat aand by ons aansluit langs die Hardekoolvuur by die Olifants.

"Nee, dis maar net ons paar," sug vriend John swaarmoedig, terwyl die naguiltjie se geroep droewiger klink as wat nodig is. "Hansman, Ouboet en Mortier se vrouens het hulle gehok vir die naweek."

"'n Beneukte vroumens is 'n verskrikking. As dit myne was, het ek haar summier gelos!" gee vriend Hay sy siening van sake.

"Dis hoekom ek nie getroud is nie, en ook nie sommer sal nie," sê Jongeling Dunn leedvermakerig.

"Miskien is dit omdat jy nie juis 'n kans staan om 'n vrou te kry nie!" kap Dok Sarel hom.

"Dis oor julle laas keer so moles gemaak het dat die ander nie hier is nie," lig ek vriend Hay in. "Jou vrou het my ook gebel, en beswaar gemaak oor jy laat en gesuip by die huis aangekom het. Maar ek verstaan dit nie mooi nie, want julle is voor my, vriend John en Dok hier weg."

Vriend Hay lag verleë. "Toe ek die ander ouens by die Mica-afdraai groet, toe sê hulle hulle gaan op Gravelotte by die Casa Creda 'n halfwegdrankie drink. Toe besluit ek om saam te ry. Toe haak ons vas daar. Later is ons honger, maar hulle bedien nie etes in die kroeg nie. Toe stel Jongeling voor ons moet by die Polisie-kantien op Tzaneen gaan eet. Die gevolg was dat ek Sondagnag half-een eers op Hoedspruit aangekom het."

"G'n wonder julle vrouens is woedend nie!" berispe Dok hom. "Wat julle ouens moet besef, is dat ons vrouens in elk geval vermoed ons kom naweke hierheen net om te drink. Jy moet seker maak dat jy niks doen wat haar vermoede bevestig nie. So, as jy Sondagmiddag by die huis kom, is jy skoon geskeer, en jy ruik nie na drank of hardekoolvuur nie. Met die afklimslag omhels jy haar, en vertel haar hoe verskriklik jy na haar verlang het. Dan is jou paspoort gestempel vir die volgende besoek!"

"Ek verstaan nie hoe sy kan sê dat ek gesuip was nie. Sy het al geslaap toe ek by die huis kom," sê vriend Hay nadat hy 'n rukkie nagedink het. "In elk geval, Dok, ek hoor wat jy sê, maar ek volg 'n ander strategie. Dit het nog altyd gewerk."

"As ek laat by die huis kom, en boonop na drank ruik, dan skop ek die voordeur met 'n moerse lawaai oop, en ek skree in die gang af 'EK SMAG NA ROWWE SEKS'! Gewoonlik slaap sy as ek in die kamer kom!"

[ENGLISH SUMMARY: Quite a few of the regulars didn't turn up for the weekend, because their wifes refused them permission. The reason for this being that they came home very late, and drunk, the previous time. Doc Sarel explains to them that it is good practise to arrive home early, clean and sober. If they then tell their wifes how often they had been thinking of them, their next visit should be ensured.

Friend Hay explains that he uses a completely different strategy. When he arrives late, smelling of alcohol, he makes a huge noise when opening the front door. Then he shouts 'I WANT SEX, NOW'! Normally his wife is asleep when he enters the room.]