TJAART se TROUE

No.3 (4/7/1998)

"Ek wonder wat lawaai die bobbejane dié tyd van die nag so?" vra vriend John, waar ons langs die hardekoolvuur by die Olifants sit.

"Luiperd," sê Dok Sarel, "luister mooi, jy kan sy skor gegrom tussen die angsskreeue van die bobbejane hoor." Selfvoldaan vat Dok 'n diep teug aan die whisky in sy BLIKBEKER. Ons luister, en wragtag, Dok is reg! Vir 'n hele ruk sit en verluister ons ons aan die skermutseling oorkant die rivier. Dok Sarel het ons laas so verbaas, dat ons besluit het om hom elke keer saam te bring. Dis boonop handig in geval van nood, en buitendien is sy konsultasies op so 'n naweek gratis.

"Wanneer vertel Dok weer 'n slag vir ons 'n storie?" waag Jongeling Dunn dit. Dok haal 'n pakkie Chesterfield uit sy sak, en vat 'n paar diep teue van beide die sigaret en die whisky. "Miskien moet ek julle vertel van Tjaart se troue."

"Mortier, skink gou nog 'n rondte," skree Hansman opgewonde, met die hakkelstorie nog vars in almal se geheue.

"As studente het 'n klomp van ons saam in 'n huis gewoon, nog voor 'n kommune uitgevind is. Op 'n Saterdagmôre kom Inus by ons aan, en vra of ons saamgaan na Tjaart se troue toe. Tjaart het saam met ons rugby gespeel, en gaan trou met 'n meisie van Naboomspruit. Haar pa is die rykste en mees vooraanstaande boer in die omgewing. Ons is nie genooi nie, maar synde Inus ons nou nooi, gaan ons saam. Ses van ons in KleinPiet se Fiat.

"In Silverton by die Palms Hotel hou KleinPiet stil dat ons ons dors kan les. Op Warmbad is ons weer dors. En op Nylstroom. Toe ons op Naboom by die hotel stilhou, is dit so 'n driekwartier voor die troue. Ons trek ons pakke aan. Inus het sy skoene by die huis vergeet, maar gelukkig het KleinPiet 'n paar ekstra vellies in die kattebak. Die probleem is net, KleinPiet het ook die kleinste voete, en Inus die grootste. Nou ruil ons so uit dat elkeen 'n paar het wat pas, maar héluit druk, behalwe vir KleinPiet, natuurlik.

"Toe ons in die kroeg sit om die druk van die skoene te verlig, vra Pine waar ons dan nou eintlik die aand gaan slaap. Inus verseker ons die bruid se pa het op die plaas voorsiening gemaak vir die ouens 'wat van vêr af kom', soos hulle altyd op troues en begrafnisse sê.

"Toe ons ons oë uitvee, is die kerkdiens al 'n halfuur aan die gang! Nou gaan wag ons maar by die stadsaal vir die onthaal. By die onthaal is ons nou goed op ons stukke. Ons sing uit volle bors. Ons hekel die bruidegom. Die gaste is gaande oor die studente se manewales. Jy kan maar sê óns tafel is die hóóftafel. Die jongmeisies háng aan ons op die dansvloer. Naboomspruit is aan ons voete!

"Later ry ons uit plaas toe. Ons het heelwat wyn en bier van die onthaal af saamgebring, en kuier te lekker. Op die plaas is die reëling dat ons jongmanne in 'n skuur slaap. Die meisies slaap in 'n rondawel so skuins oorkant. Kort voor lank gaan kuier ons by hulle. Die bruid se broer se verloofde is ook tussen hulle. Op die dansvloer het sy en Peet 'n sinnigheid in mekaar gekry. Dié twee is in 'n ernstige omhelsing toe Boetie deur die venster loer. Hy gaan roep vir Pa.

"Toe ons weer sien, staan Pa in die deur. 'Julle het genoeg moeilikheid vir een dag gemaak. Trap van my plaas af!' bulder Pa, terwyl die spiertjie op sy regter wang so spring-spring. Inus kom tot die redding met 'Oom, ek besef ons het oom-hulle se gasvryheid ernstig misbruik, maar ek dink dit sal uiters onverantwoordelik wees om ons in ons toestand op die pad te laat gaan. Ons sal nou gaan slaap, en ek sal hierdie ouens persoonlik in bedwang hou. Môre vroeg ry ons.' Pa besef toe Inus is eintlik reg, en nadat hy die voorwaardes vir ons verdere verblyf uitgespel het, is ons terug skuur toe. Peet sit die heel nag by die deur en sing 'Boetie sy's 'n Perskeblom'.

"Sesuur die volgende môre word die ganse plaas wakker van 'n helse gedruis buite - ons 6 in die swembad, net in ons onderbroeke! Toe Pa daar uitstorm, dog ek ons is dood. Sy instruksies is kort en kragtig - trap, nóu! Toe ons klaar gepak het, is daar 'n aansienlike skare op die grasperk versamel om ons af te sien, of dan eerder 'weg te sien'. Inus steek 'n hartroerende toespraak af van hoe gul ons ontvang is, hoe ons alles terdeë geniet het, en hoe innig jammer ons is dat ons ons so wangedra het!

"Toe groet ons 'n ieder en 'n elk met die hand, en klim in die Fiat. Behalwe Peet. Deur die hele seremonie het hy so eenkant gestaan en in die verte ingetuur. Toe ons al almal sit, stap hy na Verloofde toe, sê 'Till we meet again', soen haar (en haar alleen), klim in die kar, en toe ry ons.

"Peet is later met haar getroud, maar ons was nie genooi nie... "

(ENIGE OOREENKOMS MET WERKLIKE PERSONE IS BLOOT TOEVALLIG!)


[ENGLISH SUMMARY: After the small talk, Doc Sarel tells a story on how he and friends, as students, attended their friend Tjaart's wedding. They went on a drinking spree on their way to the wedding, and found themselves late for the ceremony in the church, so they joined the party at the reception in the city hall. They stole the show with their antics at the reception, and later moved on to the farm of the bride's father, where they were spending the night. Soon they found themselves joined up with the young girls for some more antics. The bride's brother did not like what he saw when he looked through the window - Peet in an embrace with hís fiancée. He called his father to the scene, who was obviously furious, and instructed them to leave the farm. After reminding him of their state of insobriety, he allowed them to stay, on strict preconditions.

The next morning everyone was awoken by a commotion in the swimming pool - our semi-naked friends. At that point they had to leave. In a somewhat formal ceremony they politely said farewell to everyone, and got into their car. Except Peet. He walked up to the fiancée, kissed her (and only her), and got into the car.

Peet later married the fiancée, but didn't invite any of them to his wedding... ]