ROOK jy PYP?

No.33(11/6/1999)

"Ek beny julle ouens," sê vriend Hay waar ons om die Hardekoolvuur langs die Olifants sit. "Julle doen almal sulke interessante werke, en ek moet heeldag in 'n drankwinkel staan en drank afsmeer aan mense."

"Klink vir my na 'n heel edel taak wat jy verrig," sê Jongeling Dunn, "amper 'n soort van liefdesdiens!"

"Ja, Jongeling," lag vriend Hay, "maar vat nou maar vir Dok Sarel. Ek meen, kan jy dink wat hy alles moet sien. En as jy die dag vir 'n uur en 'n half vir hom moet sit en wag daar in sy spreekkamer, dan kan 'n man nie help om op te let watse poppies gaan daar by sy deur in en uit nie, of hoe? Dit klink vir my na 'n resep vir vergrype!"

"Vriend Hay," sê Dok ongemaklik, "dis nie hoe dinge werk nie. Ek meen, ek is nou nie blind nie, maar as Sharon Stone nou die dag kom besoek aflê, lê ek nie daai nag wakker daaroor nie. Dis so goed ek sê vir jou as ek in jou posisie was, het ek elke dag 'n bottel whisky in werkstyd uitgedrink. En moenie vergeet nie, julle vrouens slaan ook so nou en dan daar by my uit."

"Dit is seker so, Dok, maar 'n ou wonder maar," sê vriend Hay verleë.

"Maar ek sal jou dít sê, so tussen siekte en kranklikheid deur is daar baie komiese situasies," gaan Dok voort. "So 'n ruk terug kom 'n vrou by my en nadat ons klaar gesels het, sê sy vir my sy wil baie graag hê ek moet haar man 'n slag goed ondersoek. Hy drink en rook te veel, ooreet homself, en kry geen oefening nie. Ek sê, nee dis reg, sy moet maar vir hom 'n afspraak maak."

"Nou ek het die ou nog nooit in my lewe gesien nie, maar ek weet darem hy werk by 'n garage op die dorp. Toevallig moet ek een dag iets daar gaan kry, en ek kyk toe die ouens so deur. Daar eenkant het 'n oorgewig ou met 'n woeste baard gestaan en pyp rook, en ek neem toe aan dis hy, maar ek is ook nie heeltemal seker nie."

"Ek vergeet toe heeltemal van die storie, en hy kom ook nooit by my uit nie. So 6 maande later kom mevrou my sien vir haar jaarlikse smeer. Terwyl ek besig is om die smeer te neem, val dit my weer by, en ek vra haar so terloops of haar man pyp rook. Toe vlieg sy regop, en vra benoud:

'Hoe weet jy dit?!"


[ENGLISH SUMMARY: Doc Sarel tells the guys about a visit he had from a certain lady that requested him to do a thorough examination on her husband some time, since he was overweight, and drinking and smoking to much. Doc didn't really know the man, except that he was working at a garage in town. While visiting the garage one day, he looked around to see if he could recognise the chap. Some distance away he saw a bearded overweight guy smoking a pipe, and decided that it must be him, but he wasn't sure.
He completely forgot about the whole thing, untill the lady came back 6 months later to have a smear taken. While taking the smear, he remembered again, and casually asked whether her husband was a pipe smoker. Upon which the lady jumped up and asked how he knew that! ]