VAKANSIEWERK

No.34 (25/6/1999)

"Nee, ek weet nie waar gaan die land heen nie," sê vriend Hay, waar ons om die Hardekoolvuur sit. "Dis nou al weer die een staking op die ander. Verlede week was die garages se petrol amper op oor die petroleum werkers se staking."

"Ja, ek wonder nogal wat dink hulle hoe moet ons hier langs die Olifants uitkom as ons nie petrol het nie!" werp Jongeling Dunn sy besondere insig op die onderwerp.

"En dan is daar nog die studente wat nie wil klasgelde betaal nie. Dis verregaande, man!" sê Hansman.

"Ek sien juis Mandela het hulle 'n rukkie terug so lekker uitgetrap," sê Ouboet Dunn.

"Ek het dit gemis, wat sê hy?" vra ek

"Hy sê swart studente is nie bereid om sakgeld te verdien met vakansiewerk vir karige salarisse soos wit studente nie. Hy sê hulle het 'n houding van toe-eiening wat hulle nog duur gaan kos." sê Ouboet.

"Dis hoog tyd, sou ek sê," laat vriend John hoor.

"In alle regverdigheid, ek dink dis darem baie moeiliker om deesdae vakansiewerk te kry, as byvoorbeeld in Dok Sarel se tyd," sê Jongeling, wat meer onlangs 'n student was as enige van ons ander.

"In my tyd was dit ook maar moeilik, Jongeling," sê Dok, "maar dit het gehelp as 'n mens 'n bietjie inisiatief gehad het."

"So sou jy destyds besluit het om te gaan aansoek doen vir vakansiewerk as 'n kelner op die trein. Daar sou dan 'n tou van so 100 aansoekers wees, en jy is nommer 99 in die tou vir 'n onderhoud. As jy instap sit Mnr. Broodryk, die Senior Hoofindiensneming Beampte van die Spyseniersafdeling van die Suid-Afrikaanse Spoorweë voor jou. Op daardie stadium die 2de belangrikste persoon in die land naas die Staatspresident, en net effens swakker gekwalifiseerd met sy standerd 8."

"Dan groet jy maar vriendelik met die hand, en die bottel KWV brandewyn in jou linkerhand sit jy op die lessenaar voor jou neer. Mnr. Broodryk sal vlugtig na die bottel KWV kyk, en dan begin met die vrae. 'Waarvoor staan SAS&H?' Dan sê jy 'Suid-Afrikaanse Spoorweë en Hawens, maar as 'n mens wil, kan jy ook sê Sondag Agtermiddag Slapie en Happie', en hy sal ewe beïndruk wees. Dan vra hy 'Wat is Calamari?'. Dan krap jy jou kop, en sê jy dink dit is 'n soort vis. Dan sê hy 'Ja, met baie pote'. Dan vra hy 'Wat is 'n goblet?' Dan sê jy jy is nie seker nie, maar jy dink dit is iets soos 'n dwergie, dan sê hy 'Jy is baie naby, maar dis eintlik 'n drinkglas!' "

"Na nog so 'n klompie vrae in dié trant, sal hy weer 'n keer loer na die bottel KWV, en 'n vorm uit sy laai haal, wat hy dan onderteken en formeel stempel, en aankondig dat hy hoogs beïndruk is met jou kennis van spyseniering en dat die Spyseniersafdeling kan doen met meer kandidate van jou kaliber, en dat jy die eerste kandidaat is wat aangestel word, en dan oorhandig hy die aanstellingsbrief aan jou."

"Nadat jy die brief in jou sak gesit het, bedank jy hom hartlik, vat jou bottel brandewyn en loop!"


[ENGLISH SUMMARY: Doc Sarel explains the trick of how a student should land a holiday job. When going for an interview to become a waiter on the trains, he should take a bottle of KWV brandy with, and put it on the desk of the interviewing officer. After asking a few questions, the officer would take a form from a drawer, sign it, and announce that the application was successful. After receiving the appointment letter, the student should heartyly thank him, take the bottle of brandy, and leave!]