WAASIE KWV?

No.4 (11/7/1998)

"Waar kry jy die Roodeberg?" vra vriend John, terwyl hy 'n ekstra diep teug uit die blikbeker vat. Om die hardekoolvuur is dit 'n geskarrel met die kosmakery, voor ons op ons gebruiklike middernagtelike rit langs die Olifants gaan. Jongeling Dunn sê hy gaan nie saam nie, want laas het hy uit ordentlikheid Dok Sarel sy Discovery laat bestuur, en van al die whisky het Dok een van sy splinternuwe Michelins oor 'n boomstomp afgeskryf. Dok Sarel reken net 'n mindere intellek sal met Michelins hier in die bos kom rondry.

"By die KWV," probeer ek vriend John se vraag omseil.

"Nee man, by wié?" hou hy aan.

"Ek het 'n familielid in die Paarl met 'n kwota. Ek bel hom altyd van Beaufort-Wes af as ons op pad is Kaap toe."

"Ek het eenkeer verdwaal in die Paarl," val vriend Hay uit, terwyl hy die Bief Strogonov roer.

"Jy verdwaal in Hoedspruit, man!" kap Jongeling hom, maar vriend Hay maak of hy nie hoor nie. Hy is 'n rukkie terug hier weg Hoedspruit toe om 'n drankwinkel oop te maak. Eintlik raak ons klomp maar almal half senuweeagtig as ons op groot plekke kom.

"Ek het gaan wyn koop vir my winkel," gaan vriend Hay ongestoord voort, "maar toe ek in die Paarl kom, het ek nie 'n idee waar die KWV is nie. Langs die straat staan een van ons Kaapse broers teen 'n lamppaal. Op sy gesig kan ek sien hy het al baie Oom Tas in sy lewe gedrink."

"Vriend Hay mag nou wel 'n drankwinkel op Hoedspruit hê, maar ek sweer hy het nog nooit 'n enkele bottel Oom Tas daar verkoop nie. Hoe sal hy nou weet hoe 'n lyk 'n ou wat Oom Tas drink!" sê ek, terwyl ek aan vriend John stamp. Weer maak vriend Hay asof hy nie hoor nie.

"Ek vra hom toe of hy my kan beduie hoe om by die KWV uit te kom. 'Dja, Minee. Djy ry stryt tot byrie twiere roubot, da drai djy rês...Nei, wa soe biedjie...Djy ry tot byrie dêde roubot...' Nou begin Kaapse Broer met 'n vuurhoutjie in sy oor krap. 'Oukei, Minee, noutik hom! Djy ry tot byrie viere roubot.....Yntlik, Minee, va hie wa ek in djy sta, kan i mannie byrie kawievie yt kommie!'"


[ENGLISH SUMMARY:] After the usual small talk, friend Hay, who owns a bottle store in Hoedspruit tells the guys how he once got lost in Paarl. He didn't know his way to the KWV, and asked someone on the street. This chap, who looked like a heavy drinker, tried his best to explain, but eventually gave up by saying that from that point in town it was impossible to reach the KWV!]