Wat is in 'n NAAM?!

No.43 (22/1/2000)

"Wat dwaal jy so rond?" vra ek vir vriend Hay, waar ons ander om die Hardekoolvuur by die Olifants sit. "Jy lyk kompleet soos een van Sollie se Brahmane met hartswater!"

"My kar se bleddie sleutels is weg!" sê vriend Hay vies.

"Man, kom sit rustig en drink 'n wyntjie saam met ons, dit sal jou nou-nou byval waar jy hulle neergesit het," sê vriend John.

"Nee, ek sal eerder 'n bier drink. Mortier, bring vir my 'n bier saam!" skree hy. Mortier kom aangestap met 'n groot glimlag op sy gesig, die bier in die een hand, en vriend Hay se sleutels in die ander.

"Waar kry jy hulle?" vra vriend Hay verlig.

"In jou koelerboks!" sê Mortier, en ons skater van die lag.

"Ja-nee, dis swaar as 'n mens seniel raak!" sê Jongeling Dunn.

"Seniliteit is 'n ongemaklike ding," sê Dok Sarel toe ons almal tot bedaring gekom het. "Die ander dag moes ek gaan besoek aflê by Oom Kerneels van Eeden by die ouetehuis. Hy vertel my toe dat hy 'n rukkie van tevore by sy kinders in Pretoria gaan kuier het, en dat hulle by so 'n wonderlike restaurant gaan eet het. As ek ooit in Pretoria kom, moet ek ook daar gaan eet."

"Ek vra hom toe na die naam van die restaurant. Nee, hy kan nie so onmiddellik onthou nie, maar dit sal hom nou-nou byval. Intussen vertel hy verder van die wonderlike kos wat hy geëet het, en ek moet sekerlik dit ook gaan probeer. Ek verneem weer na die naam.

`Wat is die naam van daai mooi blomme nou weer, Dok?' vra hy.

`Angeliere?' bied ek aan, maar dis nie dit nie. Intussen vertel hy my van die nagereg wat hulle geëet het.

`Dahlia?' probeer ek na 'n ruk weer. Ook nie. Nou vertel hy van die heerlike koffie.

`Wat van 'n roos?' vra ek. Ja, roos is waarna hy soek, maar nou vertel hy eers van die lekker sjokolade peppermente wat hulle gekry het.

`Wat is daai blom se naam op Engels?' vra hy later.

`Rose', sê ek, terwyl dit lyk of daar skielik 'n lig vir hom opgegaan het. Toe skree hy vir sy vrou:

`Rose, kom vertel gou vir Dok die naam van daai restaurant waar ons gaan eet het.'!"


[ENGLISH SUMMARY: The discussion around the fire deals with the problems of senility. Doc Sarel tells the guys about a recent visit to an elderly patient, who very keenly told him about a very good restaurant which he visited a while ago. The food was excellent, and Doc should definately pay a visit as well. Doc enquired about the name of the restaurant, but he couldn't remember, and continued telling about the nice food they had. After further enquiry about the name, the patient asked him to name a very sweet smelling flower. When he mentioned 'rose', the man shouted for his wife: 'Rose, come tell Doc the name of that restaurant.'!]