BRANDEWYN HET NIE BRIEKE NIE!

No.5(17/7/1998)

"DOREEN! Hahahaha!" Vriend Hay wil hom omtrent breek toe hy laataand by ons aansluit by die hardekoolvuur langs die Olifants. "Waar het jy nou al van só 'n naam gehoor vir 'n plaas! Dan sê die bordjie nog 'DOREEN, WELKOM!!!'. Hahahaha!" Ek en vriend John murmureer in ons baarde oor vriend Hay se onsensitiwiteit teenoor dié pragtige plek.

"Man, moet nou nie vir almal wys jy is 'n analafbet nie!" probeer Jongeling Dunn hom tereg wys. "ANALFABEET!" help sy Ouboet hóm reg.

"Of wat ook al. Wat vriend Hay nie besef nie, is dat 'n landmeter, wanneer hy vir die 200ste opgemete plaas 'n naam moet gee, enige iets begin neerskryf wat in sy kop kom. Soms is dit die naam van 'n meisie na wie hy verlang," herinner Jongeling ons aan sy beperkte kennis van landmeetkunde.

"En jy moet onthou daai 3 uitroeptekens na die 'WELKOM' is nie vir jóu bedoel nie, maar vir die wildstropers wat snags hier kom rondry. Soms tel hulle bande spykers op op die agterste paadjies hier rond..." deel ek my meerdere kennis van die plek met vriend Hay.

"Plaas naambordjies het met die jare baie verander," verbreek Dok Sarel na 'n ruk die stilte, terwyl 'n skopsuiltjie hier naby sy 'tjirp'- roep gee. "Vroeër was dit kort en kragtig 'TWEEFONTEIN. PIET BRUMMER'. Toe kom die emansipasie van die vrou, toe word dit 'TWYFELFONTEIN. PIET en SARIE BRUMMER'. Daarna word die Afrikaner slim en wys, toe is dit 'HIER SWOEG PIET en SARIE BRUMMER op SUKKELFONTEIN'.

"Die beste het ek nou die dag gesien toe ek ou Willie op sy plaas anderkant Tarentaalrand moes gaan spuit vir 'n seer rug. Ou Willie is mos so 'n rukkie terug op 40 eers getroud met Miena van die buurplaas. Sý toe al 35. Toe ek so verby die plaas ingange ry, sit en kyk ek juis na die naambordjies. 'HIER KEER MIENA vir HAAR WIEKETS' lees die voorlaaste een! 'BRANDEWYN HET NIE BRIEKE NIE. WILLIE en MIENA BARKHUIZEN' is die laaste een voor ek by ou Willie stilhou.

"Miena nooi my in met 'n bybie op die arm. 'Dis nog van die ongeluk, Dok' sê ou Willie waar hy in die bed lê. Miena glimlag skalks, en loop uit. Ek sê Willie moet my eers van die ongeluk vertel. Willie vertel toe dat nie hy of Miena eerder kon trou nie, omrede hulle nog hulle ouers opgepas het. Sy pa is so 5 jaar, en sy ma 2 jaar vantevore dood. Miena se ouers is die vorige jaar kort na mekaar dood. Behalwe vir die ouers oppassery, was hulle albei maar van nature skaam. Verder as mekaar by wyksbyeenkomste sien het dit nie gekom nie.

"Een Sondag na kerk besluit Willie, tot hiertoe en nie verder nie. In die kas kry hy 'n bottel en 'n half Klipdrift, en hy begin die halwe bottel drink, om moed bymekaar te skraap. Toe die halwe bottel boomskraap is, vat hy albei, en sit af met die bakkie na Miena toe. Langs die pad maak hy die halwe klaar, en sit die leë bottel by sy voete neer. 'Ou Dok, toe ons kinders was, het ons baie perd gery. My pa het my geleer 'n mens kom nie gevrek op 'n ander ou se werf aan nie. 'n Redelike galop is die regte manier. Só ry ek die Sondag by Miena in'.

"Toe Willie die remme aanslaan, is daar niks! Hy jaag deur Miena se waenhuisdeure, deur die muur aan die anderkant, tot binne-in Miena se slaapkamer, waar sy op die bed lê en slaap. Of dit van skok was, kan nie een van hulle onthou nie, maar toe hulle hulle kom kry, sit hulle altwee op die bed, en drink saam-saam aan die ander bottel brandewyn. Later het hy besef Miena het net onderklere aan... Die aand toe Willie met die stukkende bakkie wil huis toe gaan, ontdek hulle die leë bottel het agter die rempedaal te lande gekom, en verhoed dat die remme werk. Hulle is 3 maande later getroud.

"Toe ek uitstap, en vir Miena op die stoep sien sit met die bybie op die arm, toe wonder ek of 'BRANDEWYN HET NIE BRIEKE NIE' verwys na die ongeluk, of die bybie op die arm."


[ENGLISH SUMMARY:The chat around the fire is about silly names for farms. Doc Sarel tells the chaps of one he saw recently while doing a home visit, namely 'BRANDY has no BREAKES. WILLIE and MIENA BARKHUIZEN'. Willie told him how he gathered courage to court Miena, by drinking brandy one Sunday. After gathering enough courage, he took the almost empty bottle, together with a full one, and drove to Miena's farm. On the way he finished the remainder of the opened bottle, and dropped the empty bottle at his feet. On entering the farmyard, his breakes failed, and he drove through Miena's garage, through the wall on the other side, and ended up in Miena's bedroom where she was taking a nap. Due to the shock caused by the incident, they shared the other bottle of brandy. It took Willie a while to realise that Miena was not fully clothed... On leaving later that evening, Willie discovered that the empty bottle became stuck behind the break pedal, thus causing the failure of the breaks. He married Miena 3 months later.

On leaving, Doc Sarel noticed that Miena was carrying a baby in her arms. He then wondered whether 'BRANDY has no BREAKES' refered to the accident, or the baby in Miena's arms.]