KAMOEFLEERDRAG!

No.60 (30/11/2001)

"Dink jy nou regtig jy kan met daai klere aan gaan wild kyk?" vra Jongeling Dunn waar ons om die Hardekoolvuur langs die Olifants sit.

"Dis die nuutste tegnologie, Jongeling," sê vriend Hay, geklee in helderblou kamoefleerdrag, "dit maak my onsigbaar vir diere."

"Dit lyk nie juis vir my of jy onsigbaar is nie," sê Jongeling, "en jy gaan ook nie onsigbaar wees as ons in die bos is nie."

"Dis die hele idee, Jongeling," sê vriend Hay, "vir jou is ek baie goed sigbaar, maar nie vir die diere nie."

"Wel dit maak nie vir my sin nie," sê Jongeling met 'n vraende uitdrukking op sy gesig.

"Dit werk so, Jongeling," sê ek terwyl Hansman die blikbekers optop, "diere kan nie kleure sien nie, net skakerings van swart en wit. Daarom maak dit nie eintlik saak wat die kleur van kamoefleerdrag is nie. Mense, soos jy hopelik weet, kan wel kleure waarneem. Daai klere wat vriend Hay aan het maak juis dat mense hom goed kan raaksien in die bos, en hom nie dalk per ongeluk raakskiet nie. So, terwyl hy nou gekamoefleer is vir die diere, is hy terselfdertyd baie goed sigbaar vir medejagters."

"Nou hoekom het hy nie in die eerste plek so gesê nie?" vra Jongeling.

"Omdat ek nie seker is dat jy selfs na die verduideliking verstaan nie!" sê vriend Hay.

"Ja, klere en die onsigbaarheid daarvan kan soms tot ongemaklike misverstande lei," sê Dok Sarel terwyl hy teug aan sy whisky, "soos wat ek verlede week by Rus-'n-bietjie ouetehuis op Duiwelskloof moes leer. Oom Nic Schoeman se hart was nie lekker nie, toe moes ek soontoe.

'Dis ou Lettie Vermaak se skuld dat my hart nou so neuk, ou Dok,' sê Oom Nic toe ek daar aankom.

"Nou tant Lettie se kop is lankal nie meer lekker van die Alzheimer nie, en sy is besonder vergeetagtig. Die oggend het sy vergeet om klere aan te trek nadat sy gebad het, en op die manier stap sy toe poedelnakend in die eetsaal in terwyl die oues aansit vir ontbyt.

'Ou Tokkie, sien jy ook wat ek sien?' vra oom Nic toe tant Lettie instap.

'Ja, ou Nic, ek sien wat jy sien,' sê Oom Tokkie Greeff terwyl hy stik aan sy pap.

'Dink jy nie ook dis 'n bleddie skande nie, ou Tokkie?'

'Ja, ek dink ook dis 'n verdomde skande, ou Nic.'

'Wat dink jy sal dominies Steyn dink as hy daarvan hoor?'

'Ek dink hy sal ook dink dis 'n verdomde skande.'

'Nou wat gaan ons daaromtrent doen, ou Tokkie?'

'Ons moet vir haar 'n strykyster koop, ou Nic.'

'Om wat mee te maak?'

'Om daai rok wat sy aan het 'n slag te stryk,' sê oom Tokkie!"


[ENGLISH SUMMARY:Doc Sarel tells the guys about an embarassing incident at the local old age home recently. Aunt Lettie Vermaak is not quite all there due to Alzheimer's disease, and is forgetful to the extreme. On the particular morning she forgot to put on clothes after having a bath, and so it happened that she strolled into the diningroom completely naked.

Oom Nic Schoeman enquired whether Oom Tokkie Greeff had seen the spectacle. Oom Tokkie answered in the affirmative, stating that he thought it was scandalous. Oom Nic agreed, but wanted to know what they could do about the situation.

'Buy her a flat-iron,' Oom Tokkie said, 'that dress she's wearing is in desperate need of ironing.'!]