GESTOKTE WILDEMAKOU


Ja, ek het gedink jy het vermoed ek het 'n spelfout gemaak, maar nee, dit is nié 'gestoPte' wildemakou nie! Die geheim van hierdie resep is om te onthou dat 'n wildemakou (Plectropterus gambensis) nie soos jou ma se makoue heeldag op 'n dammetjie sit en wag om mielies gevoer te word nie. Hy is wild en moet heeldag rondvlieg op soek na kos, en om goed soos jakkalse en luiperds te ontduik. Gevolglik is hy redelik taai.


BESTANDDELE:

1 Mediumgrootte Wildemakou.
Groente, na smaak.
1 Bottel Asyn.
Sout.
Speserye.
Vleisversagter ('tenderiser').
1 Lengte Hardekooltak, 75cm x 3cm.
2 Lengtes Hardekooltak, 50cm x 3cm.
Bindtou.


METODE:

Kry 'n Wildemakou. Dis makliker gesê as gedaan, want hulle is vrek wild, veral die mediumgroottes. En moeilik om geskiet te kry, want hulle is taai, soos reeds gesê. As jy hom doodgeskiet kry, is daar waarskynlik niks van hom oor nie. Die beste is om 'n strik te stel, en as jy hom gevang het, sy kop met 'n byl af te kap. Oppas vir jou hand, want hy gaan 'n geveg opsit, soos hy met 'n luiperd maak.

Slag en ontveer hom. Sny hom oop van sy nek tot by sy lieste. Maak nou 'n dubbele houtkruis van die Hardekooltakke en tou, sper hom oop, en kruisig hom.

Wat jy nou nodig het, is 'n outydse koelkamer - daai tipe wat jou ouma gehad het wat onder 'n doringboom gehang het. Hy het 'n dubbele gaaswand, met steenkool tussen die gaas, wat jy nat hou met water, om afkoeling te bewerkstellig. Hang hom nou vir 'n week daarin om 'ryp' te word. Nee, hy sal nie vrot nie, solank jy die steenkool nathou.

Na 'n week haal jy hom uit, en lê hom in in asynwater. Moenie dat hy bo die water uitsteek nie, want dan sál hy vrot. Na 'n week haal jy hom uit, en vryf hom goed in met die versagter, en hang hom vir nog 5dae in die koelkamer.

Na 5 dae haal jy hom uit, en sit hom in 'n groot pot, kruis en al. Daai potte wat jou ouma gebruik het om seep in te kook sal goed werk. Gooi water, groente, en sout by. Enige groente, moenie dit te fênsie maak nie. Nou stook jy 'n behoorlike vuur onder hom, verkieslik hardekool. Laat kook hom vir 5 dae, maar hou die pot dop, hy moenie droog kook nie - min dinge is so sleg soos droë wildemakou.

Na 5 dae skep jy die groentetjies en sousie in 'n diep bord. Haal die makou uit as hy genoegsaam afgekoel het, en maak hom los. Gooi nou die makou weg, en eet die stok - hy behoort heerlik sag te wees!




TERUG NA DIE KULINÊRE BLAD!